28 / 7 / 1430
يقولوا لي يووه باقي سنه بس لو تدرين ان هالسنه عندي اخاف تمر بسرعه اخاف افقدك فيها
ودي استمتع بكل لحظه معاك
ودي اشوفك كل يوم واسولف لك عن هبالي وطيشي وش سويت اليوم وكل يوم
ودي افضفض لك الحين قبل ماتروحين عني بس وربي ذبحني التردد مادري ليه اكتم مشاعري ماأبوح فيها ما أبين لك غلاك في داخلي لما اشوفك ماودي اخبي اكثر من كذا بس مدري ليه اذا شفتك اتظاهر اني قويه وعادي بس من جواّ حيل اتعذب وحيل اخاف
والله اني فرحت لك من كل قلبي لما قلتي لي عن موعد زواجك أبي سعادتك وهناك معه وان شاءالله يا ربي انك توفقها وتسعدها
بس والله راح افقدك اذا تزوجتي
يعني خلاص انتي بتروحين عني مافيه احد اشكي له همي واسولف له الإ انتي يا عيون نوف يا إنتي
خلاص معاد فيه أي وقت اكلمك بالجوال راح تكونين مشغوله بحياتك معه
معاد فيه رسايل اخر الليل وهبال وتعليقات
معاد فيه تجين تنامين عندي او انا اجي انام عندك خلاص انتهت فصول هالحكايه
معاد فيه نروح مع بعض للكوفي والا المطعم والا السوق
لانك خلاص بتروحين ديره غير هالديره
تذكرين لما كنا نروح لبنده ايام العيد
تذكرين لما رحنا لمنتزه بالعيد وكانوا يسوون عروض ومسرحيات كنا بس جايين عشان ذاك الممثل وكنا نراقبه من بعيد على اساس هو بس بالاخير ماطلع هو الممثل وقعدنا نضحك على رجتنا وهبالنا وطيحة الوجه
تذكرين لما كنا صغار واخوي قالنا ابغى مويه رحنا انا وياك من خباثتنا وشيطنتنا حطينا فيري مع المويه وشربها هو وقعدنا نضحك عليه وحلف علينا نشربه بداله وكنا نبكي لين جت امي تحاول تبعده عنا وتسكته
تذكرين لما رحنا لـ د.كيف الصباح كنا مره مبسوطين
تذكرين لما سافرنا العام الماضي للخبر وراسلتي لي مسج عن الخبر للحين عندي هالمسج هو بالذات ماحذفته من بريدي لأني متأكده ان هو الشي الوحيد الي يذكرني فيك اذا استقريتي هناك
انا اشهد ما تبقى وسط قلبك يالخبر
إحساس
ألا يا كيف تاخذينه عن عيني وهو شوفي ؟؟
:: :: ::
انا و انتي نحب الخبر وهوانا شرقي
انا و انتي نحب المطرب هذاك ... أيام المراهقه
انا و انتي نعشق الخيل لأنه بذكرنا بذاك
انا و انتي كنا نسهر الليل مع بعض ونغني وكنا نسمع للمذيع الي انتي تحبينه وكنتي تقولين لي يا نوف أحبه
انا و انتي كنا ولا زلنا نلعب بشعور بعض وكنتي لما تنامين عندي ماتنبسطين الإ اذا لعبت بشعرك و قعدت احوس فيه
انا و انتي هبالنا واحد تفكيرنا واحد ذوقنا واحد
انا و انتي انا و انتي
تدرين انا و انتي وبس
اه في اشياء كثير ودي اقولها بس تخنقني العبره الحين بس تأكدي شي واحد هو إني احبك وانتي تدرين بهالشي
هالرساله ماراح توصل لك بس يمكن بيوم زواجك راح توصل
يا ملاذي و منتهاي و أولي
إيه أحبك فوق ما تتخيلي
إعلانات المنتدى
مرحباً بكم في مجتمعنا المتواضع مجتمع حياتها .. للإنضمام معنا الرجاء الضغط هنــا
رسائل لن تصل لاصحابها ...
.) 
