بسم الله الرحمن الرحيم


السلامـ عليكمـ ..

يامرحبا بكمـ في موضوعي




تبدأ حكايتي..حينما امتلكت هذا الجهاز الذي اصبح فيما بعد لا يطاق

كانت معاملتي معه عنيفة نوعا ما

اذ انه<<متعوب عليها ..الان مصاب بعدة كدمات..

كذلك الوجه الخلفي له لم يستطع الصمود

فأصبح يتأرجح في الهواء..علمي به في يدي ومااادري الا هالصوت اللي كنه صوت غطاء قدر

ان صح التشبيه..

كذلك الشاشة مصابة بخدوش..

والارقام سوداء من كثر كتابة الرسائل

كذلك يعاني من بطئ في الاستيعاب احيانا<<احس اني رحمته

وهذا الامر لم يحرك فيّ ساكنا

وسأطلعكم على صوره

المهم ..بعد سنتين من شراءه مللت من مقابلة وجهه

وقررت شراء جهاز جديد

وبحمد الله ابتعت جهازN82 والامور ماشية معه

وبعد ان بدأت الداومات اضطررت الى استخدام هذا الجهاز البالي

وذلك لان جهاز الكاميرا ممنوع في جامعتنا الموقرة

مرت الايام..وفي ذلك اليوم الرهيب

وبالتحديد يوم الاحد من الاسبوع الماضي الموافق..

26/10/1429هـ

كنت شبه منسدحة لان البنزين خلص على نهاية الدوام وكنت الهو بالجوال

وعندما حانت ساعة الخروج..وارتديت عباءتي..وركبت باص ابو علي

وفجأة.........

فقدت الجوال

كيف..متى ..شلون..؟؟؟؟؟

ما ادري!!!

وتضيق بي الدنيا على سعتها

لا لأني فقدت شخصه الكريم..ولكن لاني فقدت المموري

اللي فيه راس مالي

ولاّ هو فدوة للي ياخذه

وسبحان الله..قبل ايام فتحت المموري الثاني ونقلت كل اللي فيه لهذا المموري الضايع

اللي هو حق جهاز الكاميرا

2 جيجا..كله مليان..فيه كل مالذ وطاب

صور..مقاطع..اصوات..ذكريات..رسايل..برامج..ثيمات

وبصراحة ماضاق صدري على الجوال ابدا

لاني فكرت فيها من جهة ثانية<<جهة ايجابية

اني اشتري جهاز ثاني بدون كاميرا اصرف من هالخايس

طبعا يوم الاثنين حطيت بلاغ عند الامن

وقلت لابوعلي<<راعي الباص انه يدوره

يمكن طاح منا ولا منا في باصه الموقر

الامن ماجاهم شي.. وابو علي مالقاه

واللي زاد الطين بله..انه ع الصامت

يعني وين القاه في هالجامعة الكبيرة

بس انا استودعته الله..ودعيت انه يرده لي سالم

لانه فيه مقاطع مالها داعي<<لاتفهمون غلط

بس فيه صور للعائلة الكريمة..مع اني محذفتها..

بس اللي فيه شر بيطلعها وبيطلع ابوها بعد

واداوم ياطويلين العمر باقي الاسبوع بدون جوال..وكأني مدري وش اقول

احس اني نآآآقصة شي

رجلي ع رجل صديقتي وحالتي صعبة

لاني لو تعديتها بكون ضاااايعة..وبقعد كل يومي لحالي

وتبدأ التخطيطات والمشاورات..

وش اشتري جهاز..ووشلون اقنع الماما..واذا عيت كيف اقنعها!!!

وكل هالايام الجوال يرن..ماتقفل..يعني..ماانسرق

بس مستغربة انه يوم طاح مني ماتفكك

لانه بصراحة..تآآآفل العافية..مافيه روح

المهم..ويجي السبت من الاسبوع اللي بعده<<لاياشيخة

وانا طبعا هذا الاسبوع في اجازة معطيتنياها الجامعة

تقديرا لجهودي..لاني جايبة جوال كاميرا اخر الترم اللي راح

<<مايفوتون شي ماشاء الله عليهم

المهم..وطلعت صدقة عن اللي اغتبتهم ووتكفيرا لذنوبي..هذا السبت

ويجي الاحد اللي هو امس

ويدق علي ابو علي الظهر..ويقووووول

خلي اخوك يطلع ياخذ الجوال..قلت..هاه طيب ان شاء الله

وانا في قمة استغرابي..يجيب اخوي جوالي الجميل

وهو بكامل صحته وعافيته

بصرااااحة يمكن قعدت عشر دقايق ماصدقت

اسبوع كامل من الاحد للاحد وهو ضايع بعدين يجيني ولاكان صار شي

صاير طايح في الباص..مسوي يستخف دمه

مع ان ابو علي دوره الاسبوع اللي راح وقال مالقيته

قلت خلاص عليه السلام..

الظاهر انه مااهتوا ذاك الاسبوع يدوره زين

والحمد لله لقاه وجابه لحد بيتنا وانا في اجازتي

وانا اللي افتحه..طبعا تقفل لانه خلص الشحن

وتجيني هالرسايل..كل الناس تذكروني الاسبوع اللي راح

والمكالمات من امي عشانها تشيك عليه كل ماخذت

تشوف تقفل ولا لأ

بس احلى رسالة كانت من صديقتي..<كآشفتها..!>

اللي هي..

{استودعتك الله الذي لاتضيع ودائعه اللهم احفظه بحفظك

واكلأه بعنايتك ورده الى امه ردا جميلا كما رددت يوسف الى

يعقوب بعد ان ابيضت عيناه حزنا

اللهم رد ضالة فلانه وقلل نسبة فهاوتها واجعله درسا لها

ياارحم الراحمين}

ورجعلي جوالي الجميل بعد غياب اسبوع

وهذي صوره..

[IMG][/IMG]

[IMG][/IMG]


مايستفاد من القصة..

1.استخدام الجوال بحنية ورفق حتى ماتجيك نفس حالتي

2.الانتباه والفطنة وترك الفهاوة لانها سببت لي كل هالسالفة

3.اذا ضاع لك شي..استودعيه الله وقولي اللهم اني استودعتك ضالتي

4.الدعاء بحفظ اللي ضيعتيه..اللهم رب الضالة رد علي ضالتي

5.من هذه القصة تبين اثر الصدقة.

6.قد يكون ماحدث بسبب ذنوبي..وفيه حكمة من الله..اني ارجع اليه وادعوه

7.عند فقدانك لاي شي في الجامعة عليك بإبلاغ مكتب الامن

8.الامانه الامانه الامانه..بإمكان راعي الباص انه يقول مالقيته وخلصنا لكن كان عنده

امانه لذلك ابغاكم تدعون لابو علي

9.التأني والتروي ..وذلك ان امي تعمدت تأخير شراء الجهاز حتى تتثبت وتتأكد من ضياعه

10.عدم وضع اي صورة او مقطع خاص في الجوال..حتى لاتنشر لاسمح الله اذا فقدتيه

11.عدم التصوير بالجوال..لان باستطاعة الخبراء استعادة المخذوفات

12.عدم وضع اي نوع من المحرمات..موسيقى.اغاني.صور او مقاطع خليعة لان اللي بيلقاه بعدك

ويسمع اويشوف بتاخذين اثمه واثم اللي بيرسلها لهم الى يوم القيامة..



اتمنى تعجبكم سالوفتي..

طولت عليكم..اعذروني

في أمان الله


ماادري وش المشكلة مع هالصور...

تطلع كبيرة..واذا حطيتها مصغرة ماتطلع اصلا

ناوية احذفها..بس شكلكم متحمسيين تشوفون هالتحفة :)