جالسة اجهز سي ديات بأناشيد العيد عشان نشغلها بالسيارة ..

و جالسة ارفع الاناشيد عشان اضيفها للبلوج تبعي ..

و بما انه الرفع لسه مطول .. قلت من زمان ماصدعت راسكم و جلست اهرج ..






بصرآحة أحلى مفاجأة لما العيد يجي 29 .. أحسه منجد ونآسة و غير متوقع ..

تمنيت رمضآن يطول أكثر .. خصوصا اني حآسة نفسي مقصرة المرة دي .. يــآرب اغفر و تقبل ..


أول عيد بدون ..ماما.. جنتي الغالية .. الله يرحمك و يغفرلك و يجبر كسر قلبي و يرحم ضعفي يــآرب ..

اللهم اجرني في مصيبتي و اخلف لي خيرا منها ..~

كل شوية تخنقني العبرة .. غصبن عني والله .. بس ما ابغى أبكي و اخرب ع البقية فرحة العيد ..

الحمدلله ربي على كل حآل .. الحمدلله على كل حآل .. الحمدلله على كل حآل ..~





الموهيم خلوني اغير الجو و احكيكم عن بطولآتي و المدح اللي يجيني <<--- كـــف ..

خالتي"مرت بابا" .. ماشافتني ولا مرة بالمكياج ..

اليوم طبعا لبس و شياكة و ونآسة .. حطيت جلوس و كحل و ماسكرا و الظل ما اعرف احط فالحمدلله ربي و كريم الاساس ابدا ما اعترف فيه يعني مو متعبة نفسي بالمرة ..

الموهيم و لابسة و متزبطة .. خالتي شافتني قالتلي ..

يؤ يؤ يؤ .. ري ري .. ماشاءالله تبارك الله طالعة قمر والله .. لا لا لا .. لا تروحي لأبوكي كدا أغآر أنـآ ..

و أنـآ ما اصدق بأي كلمة على طول يكبر رآسي ..

الا و تسألني خالتي سؤال مبآغت .. تقولي .. انتي دخلتي كدا على خطيبك .. ؟؟؟



قلتلها لااا وي .. دخلتلوا على طبيعتي <<--- وهـ بس رجعتني تقريبا سنة ورا ..


الموهيم و شعري اليوم مفتوح كيرلي و لفيت عليه شريطة صعنونة .. خالتي و اختي نفخوووني .. يآحليلك ماشاءالله تبارك الله طآلعة صعنونة و بريئة ..

خلآص أنـآ ما اشوف شي قدآمي .. كبر رآسي وصل حده ..




و رحنا لعمتي تجمعنا عندها عشانها الكبيرة .. و انا اسلم عليها .. تقولي ان شاءالله السنة الجاية يجي العيد و انتي في حي ..شسمه..

أووب انا حمرت خدودي و صرت ميتة ضحك .. <<--- اذا استحت تضحك الحمدلله و الشكر

قالتلي ايوة فهمتيها هاااه ..






و شسمووو كمآن .. قبل يومين انا و دلعلع و امها و جدتي خرجنا و اشترينا زينة و هدايا و حاجات كدا للعيد ..

عشان ان شاءالله المرة دي عيدنا في استراحة و جمعة فحبينا نسوي حاجة غير ..

ان شاءالله بس تزبط و ننبسط ..

الموهيم نشتغل انا و بنات خالتي .. وكل شوية انا مزعجتهم اصبروا اصبروا خلوني اصور ..

دلعلع تقولي بس يابت يكفي .. صوري بالنهاية لما نخلص ..

اقولها لا لازم اصور كل الخطوآت .. قبل و اثناء و بعد

الين خلص شاحن الجوال و مامداني اكمل تصوير .. <<--- دلع لا يكون دآعية عليا ..

الموهيم ان شاءالله لما نروح الاستراحة راح اكمل تصوير ..



دحين العائلة الكريمة كلها نايمة الله يحفظهم ..

و انا الوحيدة صاحية لوحدي .. =|

كنت ح انام بس مدري ليش غيرت رأيي .. !!






اووه خلآص خلصت رفع الاناشيد .. حظكم عشان اوقف هرج شوية ..

.. يللا رايحة اضيفهم للبلوج .. و بعدين اشوف انام و لا اسويلي شغلة كمآن ..