الجزء الاول
(البارت الثامن)

"على ذاك الطريق اللي يسمونه غرام احباب وطت رجلي على دربه و لا ادري وش نوى فيني تبعته لآخر دروبه الين ان القمر قد عاب تعب قلبي و لاتعبت مسافات توديني لقيت الليله الجرذا هدب و ظل و سما و اعشاب بعد ذاك الغرام اللي يتوهني عناويني "

وصلني مسج على مبايلي

من عندووه ( و حليلهم اللي يستحون)

جان تعفد علي نوروه

نوره : منو طرش لج مسج

حمده : اميه اللهم سكنهم في مسكانهم انتي من وين ييتي

نوره : من باب الفضول

حمده جان اضربها بالمخده : نوروه صخي انا اكبر عنج بأسبوعين

نوره : مادري عاد من كثرهم

حمده : ااكبر عنج بيوم اعقل عنك بسنه

ساره : عيل انا اكبر عنج بـ 365 يوم

حمده : حشا عيوز

ساره : عيوز يعينج

حمده جان افتح عيوني :دوري عيوز داخل

محمد دش الغرفه

محمد : حمده ابا حلاوه

حمده : ياخي من وين اييبلك حلاوه سير اشحت من خوانك

نوره : حرام عليج حمودي تعالي انا بعطيك حلاوه

محمد : لا انتي مب حلوه اعععع

ساره + حمده انفجرنا من الضحك

حمده : شطور حمودي و الله انك شطور فديتك انا تعالي بعطيك كل الحلاوه اللي تباها

نوره حرجت : مب منك من اللي يعطيك ويه

حمده : ساارووه انا برقد تعبانه من امس مواصله ما رقدت غير ساعتين

ساره : نوم العوافي حتى انا برقد تعبت من الدرب

نوره : لا حول بتعقوني روحي خلاص حتى انا برقد

حمده : حد ضربج على ايدج هاذوه تلفزيون شوفي

نوره : مابا ماحب اشوف روحي

حمده : خلاص على راحتج

بندت الليت عسب ارقد

كلهم رقدوا الا انا مادري ليش يمكن لاني خايفه من اللي ياي

بس آخر شي استسلمت للنوم


اليوم الثاني

الثلاثاء

الساعه عشر


نوره : حمده قومي قومي و صمخ قووووووووومي

حمده فجيت عيوني : اصبحنا و اصبح الملك لله عالاقل اصبح على اشكال محترمه

نوره : ليش مب عايبتنج

صخيت عنها لان راسي يعورني

قمت غسلت ويهي و نزلت تحت

كلهم كانوا قاعدين تحت

حمده : السلام عليكم

كلهم : و عليكم السلام

جان اسير اقعد حذال يدوه و حطيت راسي على جتفها

اليده :تريقتي

هزيت راسي بـ(لا)

اليده : قومي تريقي عقب الا ريلج يوم بيشوفج بيقول بلشتوني بسلق

نوره : اصلن هو من بيشوفها يبزيغ ما يحتاي

حمده : من حلاة شيفتج الحين قطعتيني

ساره : بسكن مناجر الناطحة و المترديه عافان الله

بو حمد : حمده انتي ما عندج جامعه

حمده : لا اليوم الساعه وحده بروح


بيت بو خليفه

خليفه : يعني و لج ويه تروحين الجامعه انا يا مريم تكسرين كلمتي

مريم : و ليش منو تكون عسب اسمع كلمتك و بعدين انا ابويه راضي انته شلك

خليفه : جب و لا كلمه ابوج ما يدري عن مصايبج و لا بيدفنج بمكانج

مريم : انا ما سويت شي غلط

خليفه دزها عالارض : كل ها و ما سويتي شي غلط عيل شو الغلط بعينج

مريم : انت

خليفه عطاها طراق

مريم : قد هالحركه

خليفه : يعني شو بتسوين بتقولين لابوج عسب تنذبحين ولا لامج اللي بتوصل لابوج اولاً و اخيراً يا بابا سيري غرفتج ابرك لج

مريم : ما عليه يا خليفه الجامعه و بسير و انت اللي بتوصلني

خليفه يصارخ : صخي يا بنت الناس لا اقوم اوطي فبطنج الحينه

بيت ام ذياب

عبدالله : عموه وديني العاب حلام انتي وايد حلوه

عنود : دريوليه ابوك انا

عيسى نازل : خلاص حبيبي انا بوديك

عبدالله : هاذي عموه عنود مب حلوه وايد دبدوبه

عنود : دبدوبه بعينك والله انك لوتي

عبدالله : طالع على ابوه

ام ذياب : و انته و اخوك شعنه ما رحتم الدوام

عبدالله : عيسى ماخذ اجازه مرضيه و انا ماخذ اجازه

عنود : ماشوف بك مرض ماشاء الله عليك

عيسى : صخي صخي طع منو يتحرطم روحي جامعتج اول

عنود : والله انا محاضرتي الساعه 12

،،
هيه صح (غيرت نبرة صوتها) عبدالله ابغي اروح السوق

عبدالله :(عبدالله يقلدها) ليش


عنود : اباخذ فستان

عبدالله : والله ماشي شغله

عنود : محد قالك تعيل و تسوي الملجه بعد شهر شو بيمدينا نسوي

عيسى يطنز على عنود: عبدالله ابغي اروح السوق

عبدالله : ليش

عيسى : ابغي افصل كندوره ورديه

عبدالله : ما تبا تروح الصالون

عيسى : هيه ابي اروح صالون الجميله والوحش

عبدالله : تدخل جميله تظهر وحش

عيسى + عبدالله : هههههههههههههههههههههههه

عنود : بس بس صخوا و بتوديني و لا

عبدالله : خلاص انزين بس اجهزي عالساعه اربع و لاشوفي لج حد غيري


الاربعاء 18-2


رجعت من الجامعه حدي تعبانه

قوم خالووه رجعوا دبي طبعاً عشان الدوامات بس والله كان ودي يتمون معايه

و فستان الملجه فصلت فستان بدبي و بيخلص قبل الملجه بثلاث ايام

سمعت صوت زعيج ربعت عبالي شي مستوي

اثاري حمد و حمدان يشوفون مباراه

++تراهم يوم يشوفون الكوره وايد يندمجون و يصارخون

حمده : قسم بالله عبالي شي نسيت اني قاعدة فبيت مينن

حمد و حمدان طقعوها مندمجين مع المباراه

حطوا العشا تعشيت عقب رحت رقدت لاني وايد تعبانه

الخميس 15-3

بيت بو حمد

الساعه 2

حمده بالصاله

حمده : اميه هذا الدوا اللي تاخذينه الحين و ها قبل ما تنامين

اليده : لا لا انا الدختر قالي هذا اللي آخذه الحين

حمده : يميه هالرمسه مب من عندي ترا مكتوب هني

حمد دش : بلاكم انتم ليش كل هالحشره

حمده : شوف يدتك الحنايه بتي و انا بس اقنعها مصره انها تاخذ هالدوا الحين و هالدوا المفروض تاخذه قبل ما تنام

حمد : يدوه هذا ما ينأخذ الحين

يدوه : لا لا انا سمعت الدختر و هو يرمس

(الدختر =الدكتور <<العيايزعنا ما يقولن دكتور يقولن دختر)


طلعت عنهم و خليت حمد يقنع يدوه

ركبت حجرتيه

ما مداني اقعد الا و رن مبايلي

++علايوه++
يتصل بك

قلت اكيد وصلوا نزلت تحت عسب اشوفهم

نزلت شفت باب البيت ينفج

علياء : السلام عليكم

حمده : و عليكم السلام

جان تدش ريم :هلا بالعروس


حمده : اهلين شخبارج .,؟

ريم : بخير يعلج الخير

..: هود هود

حمده عدلت شيلتها : هدا هدا

علي دش : شخبارج بنت عمي

حمده تنحت و نزلت راسها : بخير يعلك الخير و انت شخبارك

علي : الحمدالله على كل حال ..الا حمدان وين

حمده رفعت راسي حطيت عيني بعينه شفت ويهه تعبان و ضعيف :حمدان بالميلس

علي : عيل انا بسير اشوفه بالاذن

حمده : اذنك معاك

ركبت الغرفة فوق تمينا نسولف
لين يات الحناية و استلمتنا كل وحده بالدور
انا ما حنيت ايدي كامل بس لين فوق الكوع بشوي عسب بالعرس بحنيها كامل فما يكون نفس الشي
و ريم و علايه تحنن عقب روحوا الساعه تسع


اليوم الثاني اليمعه

الساعه عشر

++اليوم انا موول ما رقدت حسيت قلبي يرقع طبول غير اني عقب بعد البيت اللي تربيت فيه

نزلت تحت شفت يدووه قاعده بالصاله لويت عليها و صحت

يدوه تسكتني : خلاص يا بنيتي مب زين تسوين بعمرج جي و لازم كل بنيه تروح بيت ريلها و لا بتخيسين فبيت اهلج

حمده و بعدها تصيح : يدوه مابا اروح ابا اقعد معاكم مابا اهدكم

يدوه : مب زين تسوين بعمرج جي هذا بدال ما تستانسين

حمدان دخل من برع : بل بل ليش هالمناحه

حمده لويت عليه

حمدان : بلاج والله انتوا البنات غريبات ليش تصيحين الحينه

حمده : مابا اهدكم

حمدان :لا حول ترا كل بنيه مصيرها بيت ريلها لا تيلسين تصيحين ,, قومي عني الحين لا ياكلني اخوج روحه محرج بدون شي الرياييل بيون الحين و ما وصل اللحم

حمده وخرت عنه و ركبت فوق

قعدت بغرفتيه

++صج انه الايام تركض قبل كنت صغيره العب بالحوش و انام بحضن اميه الله يرحمها و اليوم ملجتي وينج ياميه انتي الانسانه اللي احتايها اليوم ليش رحتي و خليتيني الله يرحمج كنت اتمنى تكونين معايه بهاللحظه


الساعه وحده انا بالصاله و معاي يدوه و علايه

علايه : حليلها الحين بتوقع و بتصير حرمه

صخيت عنها لان اذا رمست بصيح من الخوف

دش حمدان و معاه حمد

حمدان يبتسم : يالله وقعي

مسكت القلم و حسيت عمري بصيح
وقعت بسرعه و عطيت الدفتر لحمدان

حمدان و حمد ظهروا

علياء تيبب

يدوه لوت عليه : مبروك ،،،يدوه صاحت و انا معاها

علياء : لا حول انا بروح فوق و عليكم السلام

ضحكت عليها


علياء : اونه و كبرت حمدووه عاد لا تنسينا

حمده : اقدر انا


الساعه خمس

علايه و ريما معايه بالبيت عسب مال الصالون يت

مال الصالون كانوا ثلاث هنتين للتسريحات وحده مكياج

طبعاً مال التسريحه وحده قبضتني و وحده قبضت ريم و علايه

و المكياج خلصتني عقب اشتغلت بريم و علايه

يعني خلصنا عالساعه ثمان اول ما يو المعازيم

فديتها خالوه ام سهيل ما قصرت معايه والله اني مستحيه منها
و خالوه عاشه يات عالساعه ثمان و ربع

و نواري و ساره ما قصروا بالتعليقات


ساره : اسميها ناويه تخبل بالريال

حمده : دخيلج ساروه صخي والله احس قلبي فبطني

ساره : حشا حشا عيل يوم بيقعد حذالج شو بتسوين اضني بتصيحين

عاشه : خلاص ودريها

ساره : منو قدج عندج محامي دفاع

ريم دشت (تيبب):مبروووك

هند : خيبه زين ما كسرتي الباب

ريم : ما برد عليج ما ابغي اخرب فرحتيه

عاشه :خلاص انزلوا مب حلوه انتوا فوق و الحريم تحت

حمده : حرام لا تخلوني بروحي

ساره : هيه اميه بيعفد من الشباك بياخذها و بيشرد

ريم + هند : ههههههههههههههههههههه حلوه

عاشه:الحين بطرش نوره تقعد معاج

نزلوا تحت

نوره دشت : حمدووه حبيبه قلبي انتي

حمده : احلفي انتي بس

نوره : تصدقين عاده بس ناقص تقولين للقمر قوم و انا اقعد مطرحك

حمده : احلفي انتي بس

نوره : بل شوطتي لحظه بجلب الشريط

حمده :صخيت عنها

++كنت لابسه فستان وردي صوب الايد حركة شرات البف و صوب الصدر في كرستالات كبار و شغل و تحت منفوش و كله كو آخر شي كرستالات و شعري كنت مسوتنه بف و نازل فير بس البف كان خفيف


عقب نزلت نوره و تميت انا مع المصوره عسب تصورني

الساعه تسع و ربع

ساره دشت الغرفه : امايه تقول تسع و نص بتنزلين

حمده : خلاص انزين

ساره ترمس المصوره :she need a break

و ظهرت

قعدت عالكرسي

++اميه احس عمري بصيح عادي اسوي اي شي من الخوف

تميت قاعده لين ما يات ساره و قالت لي نزلي

انا نازلة من الدري و اسمي : بسم الله بسم الله بسم الله

ساره : هههههههههههه حسستيني رايحه عسب ينحرونج

حمده : صخي عني سارووه

ساره : انزين اوقفي هني ورا هالباب و نوروه و ريم بيفجونه الحين بيدشون الحين اقعدي

نوره و ريم دشوا

نوره : اقول ما طيحين علينا و انتي تمشين

ريم : ههه والله تسويها حمدووه

ساره دشت : اوقفن ورا الباب الحين بيشغلون الزفه

حمده اول ما فجوا الباب بغيت اصرخ مشيت ما رمت احط عيني بعين حد بس اطالع جدامي و ابتسم غصبن عني

قعدت عالاستيج حسيت نفسيتي ارتاحت

شوي و حطوا اغنية هلا (حمد العامري)

اهلا و سهلا هلا ياللي بقلبي بنيت
شيدت لك منزله تدخله متى بغيت
ان جيت كلك غلا و ان رحت روحي خذيت

كلهم قاموا رقصوا حتى ربعي

شو يات عفرا و قعدت حذالي
عفرا : منو قدج خذتي عبود مبروك عليج

حمده : الله يبارك فيج

عفرا : طاعي ويهج كيف محمر

حمده : احلفي يبين

عفرا : هههههه

عنود و ام ذياب ركبوا فوق

ام ذياب : مبروك عليج يا بنيتي

حمده : الله يبارك فيج عموه

عنود : والله و صرتي حرمة اخويه يا حمدووه

ابتسمت لها


عقب يو الحريم يسلمن و صوروا عقب قعدوا يرقصون

لين يات الساعه 10 و نص


عنود : حمده عبدالله بيدخل

حمده جان ينجلب ويهي

عنود : والله ما بياكلج

عنود : المعرس بيدخل تغطن يا حريم

وقفت و حسيت عمري بطيح

دش داخل و وراه عفرا و عنود و حذاله امه

و انا عيوني بالأرض ما رفعتها

سلم علي و باسني على راسي

عبدالله : مبروك

حمده (صوتي خفيف): الله يبارك فيك

و لبسني الدبله و الطقم و قعدنا

++من الخوف حتى ما رمت اصد عليه حسيت جسمي كله يرتجف

عنود وقفت حذالي همست لي : انزين عطيه ويه

شفت نوروه و علايوه يطالعوني و يضحكن

حسيته روحه مرتبك حتى مب عارف ييلس

صديت عليه هو لف ويهه تميت اطالعه عقب حسيت بعمريه و عدلت ويهي حسيته بيضحك

قطعنا الكيكه و قعدنا

عنود يات : المصوره تقول دشوا داخل عسب ماشي وقت و عقب روحكم بتقعدون

(لي حبيبن حيل حبيته و صار عمري و سيد خلاني انسى همي لو انا ييته و فز قلب لو تلقاني صاحبني بالعين ضميته من حسود و قول عدواني كم انا من الحب اعطيته و كم ياهو كم تفداني كم انا بالشوق خصيته ذابحني بسود الاعيان حب غيره ما تمنيته والله اني فيه هيماني ويل حالي يوم لاقيته خزني بالعين و ارماني)