عسى كل معنى يحتويه العيَد تعيشه إنت ب أعيآدك - الصفحة 2

بروق الغلا · 08 09 2010, 08:57

لي بْــآآآك

موضوعك مررره حَمْـآآآآآس

ẑфẑ · 08 09 2010, 09:45

وعليكم السلام ورحمة الله وبركاته

جبتيها ع الجرررح شسمه اول كنت اتحنى واكشخ بعمري وتسذا ولا جابوا خبر العيد بالتلفزيون تعالي شوفي نفسية ولد خالتي الصيحه بعينه

يقووول لاااااا قرب المدرررسهككككك تفكير عاد اجلس اواسيه وتسذا ضعيف خصوصن اني دوم مستقويه عليه

ايه همين اروح اجهز لبسين للعيد واحد للمسجد والثاني للقاعه مع الشباصات والتطقيمات وماننسى الشنطه ياوتس يوم كبرت حسيت اني سخيفه عندي جميع الالوان والدرجات من الشنط

والطرطعان ماننساه نروح من الساعه 8 للقاعه ونتعيد وننقسم قروبين بنات وعيال نتطال بالطرطعان بس صار مره موقف تبنا عن هالشي كنا متحمسين وشوي الا وخلاص بنفوز على العيال مادرينا الا اللي تطامر وتصارخ كنت يمكن

برابع مدري بخامس وكان شتاء والجو غيم ومطامر ومصايح شوي الا تمسك يدها وتقعد تصيح اثاري العيال شابين تحتها فحموصارت يدها سوداء من شسمه عقبهآ تأدبنا واعتزلنا الطراطيع عقب سالفتها

وكان فيه مسابقات وحماس اتذكر كانوا يحطون مسابقات حفظ جزئيه من القرآن وكنت احفظ طول رمضان واراجع عشان لاسمعت بالعيد ولاني اصير قدعه مااتذكر الجوائز بالضبط بس اتذكر اني فزت مره بساعه ورديه لاني سمعت لهم جزء

عمّ وتبارك

ايه وكان قبل يوم كنا وغدان كان عيد الفطر شتاء فيقومون يخيمون من ثاني العيد لين يقولون المدرسه باتسر

واللي يبي ينام واللي يبي يجي كل يوم يجيب غداه ويقعد لليل بس ماكان احد ينام الا الشباب

الحين لاحول ولاقوة الا بالله انواع الكآبه تحول العيد لليل بدل النهار ولو رحنا تقابلنا ساكتين نتفرج على خلق الله اللي ترقص واللي بها النوم واللي مدري ايش وقسسم يجيك النوم وانتي جالسه مره من المرات صفطت ونمت وانا قاعده

من الملل ومحدن درى بي اني نايمه

وانواع الطفش فيعني اخم مخدتي احسسن لي ولا اقعد فالبيت على هالبليّه ولا مع الفاهيات ابرررك

ياوين اول كنت اطاير وآخذ عيديات وحركات الحين آخذ عيدياتي بحلومي

وبس

شواقه

عيدك مبارك ومشكوره ع الموضوع الفله

غَادَه · 08 09 2010, 11:36

السلام عليكم
ربي يسلم يدينك على الموضوع الي بيفتح ذكرياتنا الطفوليه بالعيد >>>تكتها العبرة
آآآآآآه ياأشواق قبل لاقالو بركة العيد قسم أحس البيت كله يرقص طبعا قبلها اكون شارية
فساتني ومجهزته بالدولاب مع الجزمة ( تكرمووون) مع جرباتي وياويل الي يحركهم من مكانهم >>> صدز بزر
ويوم العيد اقوووم واخذ العيديات من أمي وابوي >>>والله هذا الي فاقدته الحين
وكنى نطلع ونلعب نعلب نلعب لين يطلع اللعب من أذانا يالله قسم تحسييين انك صدز في عيييد ووناسة ايييييه دنيا>>>
لاااااااااا وأذكر شيء قبل أبوي يقول لي انا وأخواني اكتبوا وين تبون ترحوون بالعيد عاد تشوفيني رازة ورقتي اول وحده
قدام وجه عشان يوديني كل ماكان أبغاه لا والي يضحك أني اكتب أماكن ماهي موجوده عندنا اكون سامعتها من التلفزيون واحسبها عندنا >>>الله يرحم ضعفي ...

ويعطيك العافية مرة ثانية وكل عام وأنتم بخير والله يتقبل منا الصيام والقيام

Ā ѕ h ώ α g ♠ · 09 09 2010, 12:21

•«{ ξــٍآشقـٍگ للثمـٍـٍـٍآلـٍ?

ياهـلا وغلا

يووووووهـ ياحركات التطقييم والكشخه...هههههههههههههههه ياويلي على الصورارييخ اجل 200 هااهـ..والاناشييد والصوت والاشياء الي حاطتها حاله خاصه>>حنيت لايام قبل
وش دراك مابه سكينه ولا شوكه الا بالمطاعم
يالبــــــــــــــــى انتي

اله يخلي امك لك ويطول بعمرها يارب

يسسعدك ربي

ෆ مـــلَآذ ෆ
مرحبتييين

اييه والله وشوله منزلته...يالبى الحماااس والتجهيز والحنا عااد ..اوما رشاش..وعااد صف الطابور عشاان العيدياات..اكره العييد الحيين من الفشكره الي فييه

المشاركة الأصلية كتبت بواسطة
لحين بس عيوني تطالع بحوشنا وقلبي يوجعني يبيله فرررك عقب طراطيع أقآربنا ..
ايييه والله تزملين لـ/هالشي توك غاسلته وتلقينه

يسسعدك ربي

منُو آلدميّلا =p

اهلييين

الحمد لله بخير من الله
هههههههههههههههههههههه يالبييه ياولد خالتك وقسم مالومه من الخوف مع اني احب هالاشياء بسس اوقات اكرهـ
يالبى الحماااس..ان شاء الله تفرحين وتستانسيين على هالحمااس ياارب

يسسسعدك ربي

Za3torAh
يامرحبا السااع

ههههههههههههههه....ياويلي لااازم يصير منفوش وكل شي طقم..
زوزو 11 تروحيين..قد خلص العييد عندنا هالوقت
اللهي يسسسعدك

ιά₫ч вℓāçҝ ●
ياهلاا

ههههههههههههه حتى انتم عندكم هالي يطلع ..للحيين يقلون خالاتي للصغار كله عشان ينامون..يازيين الشارع ولعببه وقسم تحسسين بوناسسه العييد
يسسعدك ربي

Reemi
اهليين

ههههههههههههههههههههههه يالبى ما تغير غير الغطى...ياحملة التنظيف الي تجي ...تقريبا عييدكم مثلاا واهم شيي اخواتتك.. الله يدييم هالوناسه ولا تنسين تشوفيين امك وهي تطبخ
يسسعدك ربي

طفولة أنثى
يامرحبا

ونااااااااسسسه الفره بسس تصدقيين ماقدر جربتها وانا صغيره شكلي بجربها الحيين
ان شاء الله هالعييد غير وتستانسسسن
يسسعدك ربي

₪هدوء الذات₪
ياهلا وغلا

هههههههههه يعني انك شسمه ما تطلعين الشارع...يالبييه ياحنا اليديين وربي اشتهييته...اهممم شييي بكم شريتي الفستاان

يارب تفرحيين هالمره وتستانسيين
يسسعدك ربي

بنوووتة عسولة
يامسهلااا

هههههههههههههههههههههههه وش دخلك بالجيران تشوفيين عيدهم...اوما الشنططه ماحد قدك كاششخه بهاا وكل شوي فاتحتها تقوليين بها كنز
ياحيااتي بنوته مره ثانييه لا تطلعيين الشارع..
يسسعدك ربي

دلع أنثى
يامرحباا

الله يدييم هالفرحه علييكم ياارب... حركاات يالبنت الكبيره
اللهي يسسعدك

نسيم الفردوس
ياهلا وغلاا

ياحيااتي كلن ع هم سر الناس بالعييد ويفكر بالمدرسه...اييه يازيين العييد بالشتاء من 2 يوم وانتي مخييمه ..وقسسم صادقه الحيين تناميين من السكوت والهدوء الذي يعم المكان وما تشوفين غير هالشي..
نسييم يمدحون خم المخده الححييين
يسسعدك ربي

مواويل
اهليين

يوووووووووووووهـ ياللعب ما تجي الساعه 12 غير انك منهده وخامده ما تدريين
ياعويينتي داييم نقول ودونا للأماكن الي مو عندنا
اللهي يسسعدك

ياقلب? تبسم · 09 09 2010, 12:38

,
.

وعليكم السلام ورحمة الله وبركاته

هلا وغلا بشوشو يازينك ويازين موضيعك الكشخه مثلك
ي لبى قلبك يااعسل وتسلم يدينك ع طرح الموضوع الشيق
بنـٍبه لكل العالم

____

والله العيد قبل كان فيه الحلاوه الي في العيد لها طعم غير ووناسه وفله وسعه صدر وفله حجاج وكل ابو خاقه
لان كان اول كنا صغار واذا شفنا البس الجديد طرنا فيه ومايهمنا احد غير لبسنا
وعيديتنا واتذكر كنت اول ماتشتري لي امي الله يحفظها لي لبس العيد كنت كل يوم ناطه عندها بالمطبخ
وقول وش ذا العيد طول متى يجي طفشنا وكانت تقولي ماطار العيد اهم شي الواحد يستانس برمضان والعيد هديه من الله لان اجتهدنا بالعباده
وبحكم ان صغار ماكانت وناستنا الا العب والحلويات وكنت البس ثوب العيد كل يوم وكل ساعه كل مافسخته رديت ولبسته مره ثانيه
من شوقي للعيد وامي تطفش من حركاتي وتأخذ لبسي وترفعه عني من كثر مالبسته حفظته هع وكنت اصيح اذا رفعته ههههههه
واذا جات ليله العيد ماانام كنت اسوي ربشه وحوسه بالبيت انا واخواني وكنت ازعج ابوي من كثر ماااسولف
ماتجي صلاه العيد الا وهو ماعاد فيه شده من كثر ماسوينا لها ازعاج بس والله انها يشاركنا الفرحه بكل سعه صدري لبى قليبه
ولا يعصب ابد الله يحفظ لي ابوي ويحفظ لكم ابائكم وبعد كذا نروح لعماني ونصير اول ناس عندهم من كثر حماسنا
ونزعج جدتي وجدي من كثر الفرحه تشوفين الصراخ مايوقف والشلوخه والصواريخ ماتترك >ْ~ مايمديكم على الجمله ذي

واكثر شي يعجبني بالعيد ويحمسني الشلوخه لان كنا مانلعب بها لعب اي لعب كنا نسوي نفسنا مجرمين وزي سذا

ندخل داخل البيت واذا شفنا احد من عيال عماني جاي نرميه وصارت حوادث كثيره ومثل سذا وكان العيد فله لان عندي عمي كبري فكان
مرجوج اقوى شي وفله

وعقبها حرم ابوي يجيبها مايجيب غير الثوم بس اذا ازعجنه يجيبها وامي تشرف علينا
>ي , كثر حسيتس
اما عيد اليوم لما كبرنا ماعاد نحس بلذه العيد وكنه يوم عادي عندي مثل باقي الايام
بس بعض الاعياد احس لها طعم اذا كنا في السدير عند اخوالي فله لاني افضل عيد القرى على عيد المدن لان في السدير احس العيد غير والجو فله وكل ابو حاجه
ولان مازلت عندهم العادات القديمه الى الان مثل يتجمعون وهم جماعه المسجد وكل واحد يطلع عيده وهذا شي حلو
وان شاء الله عيدي ذي السنه غير ....~
وكل عام وانتم جميع بخير وينعاد علينا وعليك بخير
وتقبل الله منا ومنكم صالح الاعمال
وشكرا لك يااشوشو على الموضوع البطل مثلتس ..

,
.

мêмê’ · 09 09 2010, 06:18

بسم الله الرحمن الرحيم

والله ياهو موضوع ينبش عرووق المخيخ

يازين اعياد اول .. من لداية رمضان
واحنا نطحس بسوق المجد .. كان شي كشخه .. وناخذ عشر طعشر لبسه وللمقياس .. افصخ البس وبخششه شاقه للاذان
عكس الحين اذا قالوا بكره عيد رحتي تكملين لبسك وبالعذاب تلقين
بعدين اختار لي 3 لبسات واطقم جزمه < الله يكرمكم
وشنطه وحركات وبركات وبكلات

اجلس رمضان كله ..بعد كل تراويح
اتميلح قدام هالمرايه والبس وافصخ بكل اعجاب وفخر

وهي تحوم التسسبد

واذا جاء 28 ..اشغل الرادو > كح اتشششو
اذا قالوا عييد
رحت اركككضض حافيه للمسجد جنبنا اعلم ابوي عششان يقول بالمايك
وارجع للبيت صاروخ وخشتي منفتحه وشعري وراي يهفهف ويعجعج ريحته حناء > تحنيه قبل العيد ب 3 ايام

واحني يدييني .. وتتسلط الحكات

يمممه حكي خدي
يممه ظهري يدغدغ
يممه جبهتتي تحكني
وتحك
وانا لالا موب من هناا شوي من هناك من هناك
يجي الصبح وامي تحكك فيني ..تقل فيني جرب

بعدين ننام ..والفجر اقوم واغسل الحنااء ويدي متعرعرره كنها يد وحده ام 300 سنه

بعدين البس ونرووح نصلي العييييد
وونوزع حلاوو وناخذ
ونرجع للبيت
البخوور والصواريخ والحلاة
وكلا لابس وكاشخ
عاد تبتدأ معركتي انا وبنت اختي ..

مع عيال الجيران

من اقوى ع الثاني

مره دخل ولدهم كبرنا وجلدنااا

ومن عقبها ماعاد اعتدينا ع احد

وبيتنا ناس تدخل وناس تطلع
وفلة حجاج
وتوزيع هدايا
وررقص

ونحشات للبقاله نشتري ولاعه

والظهر نتفرق ننام نريح
ونقوم اخر العصر
نتكشخ ونروح عيد الليل مع اقاربنا

ولعببب وطرطعه ووحرايق ومصايب ومستشفيات ووناسه

>>امحق !

من مواقفي وانا صغيره ..

في عيد الليل ..قددددررر كببببببببييييييييير حق ذبايح كبيرر مررره ماعمري شفت مثله
مدري انا صغيره واشوفه كبير ..مدري هو كبير

دفنني واحد من هالمبزره وانا بكامل اناقتي

وطرررررررررررررررققققققققششششش وسط القدرر والشحم

وطلعووني اتمالص واتزالق من هالشحم

وراحت كشختي هبااء منثورا

ورجعت تسبحت ولبست لبس ثاني

ولموقف الثآني

كنت بعيد من الاعياد
شاريه شنطه خضراء فاق لونها يفققققع التسبد
وكنت مره مستانسه وارززها
واستملح وتسذا محد قدي

جو ولدين سحبوها
ودخلوا فيها صاروووخ
ووووووووززززززززززز وانششقت وطررراع الصاروخ واحترقت

وانقلب عيدي عززا

بس اذا ذكرتها الحين ..اقول والله انهم مسوين فيني خير بذيك الشنطه

واللموقف الثالث

استعرض قدام هالمبزره
اني قوويه
والعاب الناريه افقعها بيدي
عطوني قنبله
قالوا يله اتحداك
وانا انسسددح ع بطني
واشب القنبله فالارض
والصق وجهي فيهااا
بكككككككل قووووووه
ودووووووووووب بعييييييييييني
واااااااااااااااااااااااااااااءءءءءءءءءءءءء صياح .. ودوني المستشفى وعطوني حلاوه هههههههه

رجعت ملزقه عيني ..قالوا مو انت قويه

قلت الا قوييه بس انا اصلا ودي اروح عشان يعطووني حلاوه >> الله من الصدزز بسس ..مازلت على عمى ضلالي

...

اما الحينن

صح نفس الشي الصبح ونتبادل هدايا ورقص
بس مافيه وناسه قويه

صار همنا التنظيف
والبزاريين ودنا نونسهم بااي شيي

حتى اللبس مانحرص عليه ندورر زين وكذا
مره عااااااادي عندنا

بس قلوبنا تستانس غصب

الحمدلله ......

والله يتقبل مننا صيامنا ويعييد علينا رمضاااااان بالخييييرر

شهووووووووقه ..

بَدوور❥ · 09 09 2010, 07:11

رجعت عقب السحووور

والله العيد من زمآن والحين ما احسه تغييير

بقولكم من ليلة العيد

نكوون حآيسين البيت في الترتيبات والتغيراات
وامي في المطبخ تجهز قهووة والفواله حقت النسوان والرياجييل ,,

عقب ما نخلص الترتيباات نستلم البزرااان <<ما احس بطعم العيد الا اذا استشورت شعورهم
هذا اذا وحده من خوااتي عندنا واذا مافيه استلم بناات اخي <<كوافيره هع

وبعدييين نقعد نفلها أليييييين الفجر مع خووواتي ,,

ويجي الصبح وتقووم امي وعمتي وخواني يروحون صلاة العيد ,,

وحنا نقعد عند التلفزوون نشوف صلاة العيد في قطر ومكه

ويجووون من الصلاه ونعايدهم ويكوون جاين خوالي وجدتي وباقي العايله الكريمه يعايدونآ <<هذا عقب صلاة العيد

ونلبس ونخلاص ونفرفر على بيوت العايله كلها نعايدهم

ويكون العيد الظهر كلعاده في بيت عمتي والعصر نرجع لبيتنا عاد تعالوا شوفوا الاشكال تفطس من الضحك
ونسحبها نووومه ليين المغرب ونقووم ونشووف الجمعه عند من ونروح لهم

وهذا العيد عندنآ
وهذي لش اشواااق

ẠĻ-βαṱδδĻ · 09 09 2010, 09:51

و عليكم السلام و الرحمه و الاكرام

تمام الحمدلله بخير و سهاله

احنا نعيد في بيت جدي كل العيله لازم نعيد عنده

نروح من بعد صلاة الفجر بيت جدي و بعدين نروح مصلى العيد
و بعد كذا نسلم على جدي و اعمامي و ناخذ العيديات

و بعدين يروحون الرجال يعيدون و احنا نطلع بعدهم <<

و نرجع من عند جدي بعد الظهر يمكن الساعه 2 او 3

و في الليل العشا في بيت جدي
و الـ3 ايام اللي بعد يوم العيد نروح استراحه و ام الفله و هبال البنات كله نطلعه و المضاربات اقوى شي

هذا عيدنا من يوم ما خلقني ربي

يمكن اللي تغير اني كنت احط حنا و انا صغيره و الحين ما احط عشان ما احبه

شواقه
<< لكِـ:

توته666 · 10 09 2010, 02:15

وعليكم السلام ورحمة الله وبركاته م

وضوعك مرررره روعه

ياالله العيد اول اجمل مو بس احناء نقوله امي وجدتنا يقولونها اول العيد فرحته غيررررررررررر كنت احط ملابسي عند راسي والحنه بيديني انتضر الصباح واي واي وصلاه العيد غيرررررررررر غير احداث يوم العيد جميله مافي مقارنه مع عيد هاالوقت الحمد لله

كل سنه وانتم باااالف خير

Ā ѕ h ώ α g ♠ · 10 09 2010, 03:10

ياقلبي تبسسم
ياهلا وغلا

هههههههههههه اوما علىى الوناسه الي تجيك على البسس ودك ما تفسخينه ابد من الفرحه
اييه والله يالبى سدير للحييين محتفظيين بالعادات

وتحسسين بونااسه كل يطلع عيده ويجتمعون اهل الحي سوااا
تععااالي لسدير هماهـ عشان تستانسين

يسسعدك ربي

ميمي
يامرحبا

هههههههههههههههههههههههههههههههه اقرا وانا مييته ضحك

اضحك الله سنك

لا تعليق على المواقف

يسسسعدك ربي

قطريه كول
اهليين

حركاااااات اجل انتي كوافيره

ياحلوو صلاة العييد يجيك شعور وانتي تشوفيين الحرم

يسسعدك ربي

تووولا
ياهلا

ماشاء الله عيييد ولا احلى منه اله ييدم الفرحه علييكم
يسسعدك ربي

توته666
يامرحبتين

والله صادقه عييد قبل مافيه مقارنه بينه وبين عيد الحين

يسسعدك ربي

مدرـرـرعمة · 15 09 2010, 01:18

موضوع ونيييييس

لي رجعه بعد ماتخلص الفعاليات والازعآج اللي عندي ><

مدرـرـرعمة · 17 09 2010, 01:56

ايييه والله يآزين اعيآد اول .. الواحد يحس انه في عيد موب هالايام كني رآيحه لعزيمه عآديه ><

اعياد اول عندنا ماتحلى الا بحلآو التوفي .. اللي قرآطيسه حمرآء وصفرآء شفافه
هذآ لآزم لزوووم يجي ف العيد .. وناخذ صفراء ثم نرجعها وناخذ حمراء كنه يفرق الطعم عاد

ولآ اللبس .. عشرين الف قطعه ولآ مايصير لبس عيد ( فستان+ شنطه لتجميع العيديات والحلاو + قبعه كبر قريح + جزمه +_ شراب كشكش مدري وشسمه)
غير الغيار اللي شررط انه يصير جديد .. حتى الملابس الداخليه مانلبس الا جديده < مادروا عنآ

وعاد تشوفون حركات اللي شوفوني وانا افك قرطاسة البجامه .. ولآ اقطع ستيكر القميص خخخخخخ .. يآ للبراءه البايخه

التجهيزآت تبدآ من كم يوم قبل العيد .. والشنطه البنيه لآزم نصك سحابها قبل العيد بليلتين .. وفيها كل شي جديد
وليلة العيد نصير عند جدتي الله يرحمها نجهز للعيد ..

الحنـآآآآآآآآآء هذا شي ثآني .. يعني مدري وش حادنا عليه وهو يعرعر بيدينا ويحرررررها ..
عناء في حطه .. وعناء اثناء انتظار طبع لونه .. وعناء في غسله .. وعناء بعد غسله
تحطه امي وحفله لآيوصخ لبسي ولآ ينزل عن يدي .. واذا حزمت عليه .. تبدآ الحكه والحمام

وانتي تغسلينه ساعه تقشرين اليابس ويوجع وحاله

وبعد مانغسله يجي دور الفازلين ومشتقاته عشان مايحرني ويحكني .. وهاليد الضعيفه متعرعره كني خامرتها ثلاث ايام ف مويه

نبدآ صبآح العيد والشنطه معلقه بالمايل ع الفستان الكوشخه

.. ومجهزتها للريالات اللي بتجيها وحاطه عده الشروخه والصواريخ والولاعه .. ويآحبيلنا قنوعيييين
لو يعطونا ريال طرنا به .. والحين :(
يلفلفونها بشكل حلو .. وخمسه ولآ عشره .. ويحطونها باكياس حلوه ومعها قرآبيع ثانيه وتعطينها البزر .. ومن غير نفس يآخذها

بس تصدقون العيد هالايام بعد حلوو .. يعني مو معنى كبرنا رآحت لذه العيد .. بس يمكن يفتقد لبعض الحمآس < طاح الحنك
بصرآحه اللبس احيآن يكره الواحد بطاري العيد .. تشيلين هم وين بتلقين لبسك ومن يودي ومن يجيب وكلش غالي ومافيه شي يعجبك

غير الاعياد الرسميه .. تجيب للواحد الاحبآآآآآآط

< ابد ماراحت هالسنه لعيدهم وحآمت تسبدهآ

وبس تعبت وانا اكتب

мαячσỜм ✿ · 17 09 2010, 03:32

أهنن وسهنن بـ اشوآق ..
تدرين ..؟
سمعت الانشوده اول مافتحت الصفحه ..
لو شفتي ردتي فعلي .. خلآلآلآلآص انسدحت ضحك

مغبررره شوآقه

أموت وعرف من وين جبتيهاا بسس !
أمـآ عن عيدي ..كشخت وتزينت حق نفسي

وظليت بالبيت
> خوش عيد ..
ولآ عشوق الصور اللي حـآطه ..رجعت ابو الذكريـآت ..

..

عنـآق مودهـ ..

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)